Navrae: Mike Eaton, tel. 083 636 0900 -
Datum: 27 Mei
2005
Sper: Geen
VELDRYGEMEENSKAP OP DIE SPOOR VAN 'N GESAMENTLIKE BESTEMMING
Mnr Marthinus van Schalkwyk, Minister van Omgewingsake en Toerisme, het
in April 2005 sy kommer uitgespreek oor die toenemende uitwerking van
veldry op die ekologie. Hy het ‘n beroep op die veldrygemeenskap gedoen
om maniere te vind om hulself te reguleer voor hy gedwing word om
eensydig op te tree.
In reaksie hierop het verteenwoordigers van verskillende afdelings van
die veldrybedryf en -gemeenskap onlangs die Nasionale Veldrywerkwinkel
(NVW / NOW) gevorm met die doel om ‘n witskrif saam te stel wat aan die
Minister oorhandig sal word. Dit sal afgehandel word binne die
tydraamwerk van ses maande, wat deur die minister gestel is.
”Regoor Afrika en die wêreld word ons natuurlike hulpbronne uit onkunde
en deur oorbenutting, selfsug vernietig. Dit is ongetwyfeld só dat ons
kinders in die toekoms nie dieselfde voordele sal geniet as wat ons in
die verlede geniet het nie.” sê Mnr. Jan Joubert, bekende
veldryskrywer, safarigids, omgewingsbewaarder en sameroeper van die
Nasionale Veldrywerkwinkel,
“Minister van Schalkwyk se beroep vir samewerking op die veldrybedryf
is geregverdig en daar is nog tyd om verdere onbedagsame vernietiging
van ons pragtige land te stop deur middel van opleiding en
weldeurdagte, besliste optrede” sê hy.
Verteenwoordigers van veldrybelangegroepe het in ’n ongekende vertoon
van eensgesindheid die uitdaging aanvaar om die volhoubaarheid van
Afrika se skatkis van hulpbronne vir toekomstige geslagte te help
bewaar en om hierdie taak ’n gemeenskaplike doel te maak. Elke
belangegroep kan nou uit sy eie unieke perspektief help om hierdie doel
te bereik, deur by te dra tot die witskrif wat by die werkwinkel van 18
tot 20 Oktober in George opgestel sal word.
“Ons kyk ook verder as die minister se ultimatum aan 4x4-voertuie en
viertrekroetes, want ons wil die kwessie holisties benader. Ons wil ook
kennis neem van die rol van opvoeding, opleiding, die inheemse
bevolking, wetstoepassingsliggame en die toerismebedryf,” sê Joubert.
Belangegroepe word aangemoedig om Joubert by 021-850-0010 so gou moontlik te skakel.
